苏州的第二场雪来了：严冬又见冰赛雪苏州话说连底冻
今年苏州葛天气拿几化人侪冻得哇哇抓抓，温度是吓人到怪，一路从十几度吧啦吧啦跌下来，跌到仔零下九度。
伲外婆也勒讲，六零年过后，朆见歇过实梗冷葛日脚。
速冻模式里，几化人屋里葛水管侪爆脱则，甚超至于今年葛一记头去脱葛人数也比往年翻仔几倍。
但不过呢，嘦得倷做好防寒保暖工作，实梗葛天气还是别有一番味道葛。譬方说，苏州葛湖/河，就多年弗见冰冻则，橑檐浪也长远朆看见凌溏则。
今年顶顶让人激动葛就是太湖结冰则，沿仔湖岸葛一大片水面连仔浪头一淘，全部冻牢，冻出仔一种贝加尔湖葛味道。
城里葛小河浜也侪冻牢则，但不过冰层还弗算厚，假使真正冷起来，底也要冻牢葛，苏州人就拿实梗冷葛现象称为“连底冻”。
顾名思义，说葛就是河面结冰一脚冻到底。
讲勒海元朝到清朝末年，中国侪属于小冰期，特别是明朝末年到清朝初年（1650—1700）葛几十年里，大冷天冷到骨头里得勒。
清初文人姚廷遴就勒俚葛《续历年记》里记载仔当时辰光江南封冻葛情况。
《续历年记》：“十二月发大冷，黄浦内俱结冰，条条河俱连底冻紧，……年货件件皆贵，因客舡胶断故也。”
后世文人创作葛辰光也会得用着该个词汇，用来描述心情，譬方说清朝艾纳居士写葛《豆棚闲话》里就写着：
《豆棚闲话》：“说得显者热闹胸中化作一团冰雪，连底冻的相似。”
但不过啊，除脱仔该个字面意思以外，“连底冻”还有另外一个引申葛含义，勒明清辰光呢，解释成功“一脚一脚住下去”。
《海上繁华梦初集》14回：“少安方才与你一同吃了楚云那边的酒，没有回来，谅是俗语说的“连底冻”了，你却怎的出来？”
《续海上繁华梦1集》10：“回本想不再回去，怎奈昨天刚刚住了一夜，不化钱的相好，连底冻究说不出，只得怏怏而返。”
而到仔现在，长住葛意思弗常用则，另外一个意思倒是讲得多：“一脚一脚葛躺下去”。
就是说有种人，早浪弗起来，一脚躺勒床浪，躺死躺活，躺到夜里困觉辰光，那末接牢，继续躺，所谓连底冻。
特别是勒海该种天寒地冻葛日脚，碰着休息日脚，嘦得有网，人好躺死尸躺到天荒地老得勒。
该趟发冷汛葛辰光，倷曾阿“连底冻”吤？
词汇释义：
- 哇哇抓抓「ua ua tsa tsa」形容很深的伤害。
- 吓人到怪「haq gnin tau kua」形容十分可怕，吓到人。
- 甚超至于「zen tshau tsyu yu」甚至。
- 嘦得「ciau teq」合音字。只要。
- 橑檐「liau ye」屋檐。
- 凌溏「lin daon」屋檐下挂着的冰凌。注：溏应为两点水。
- 一脚「iq ciaq」一直。
- 躺死尸「thaon si syu」睡觉（贬义）。
- 发冷汛「faeq lan sin」天气转冷，温度骤降。
